Maniaiti Marae
Ko Maniaiti Marae, Wallace Pā rānei, he marae o Ngāti Manunui kei Ngāpuke, e 6 kiromita pea te tawhiti atu i Taumarunui, i te puku o Te Ika-a-Māui, Aotearoa. Kei Ngāpuke he ngahere paina. Ka rere ko te awa o Pungapunga ki mua o te marae, he wai kaukau, he wai mahi tuna ki te hīnaki.
Ko ngā tūpuna[takatā | takatā pūtake]
Ko te nuinga o ngā tāngata o tēnei marae ngā uri o Nehuora Te Warahi rāua ko tana hoa rangatira a Te Wakatahurangi Te Warahi. (Ko Chadwick te ingoa whānau o Te Wakatahurangi). Ko Nanny Maraea tōna ingoa e mōhiotia whānuitia. Ka nui te kaha o Nanny Maraea ki mahi whakatū i tēnei marae. Ko tana tāne a Nehuora he tino kaumātua; nāna tonu te mahi āwhina i a Te Wakatahurangi i te whānautanga mai o ā rāua tamariki, me ā rāua mokopuna anō. ko te whakaaro, kotahi rau pea ngā tamariki i whakawhānau ai ia — ko āna mokopuna, ko ngā mokopuna tonu o tāngata kē. Ko ngā uri o tēnei marae ko ngā whānau Warahi (ngā Wallace rānei), ko ngā Chadwick, me ngā Roderick, me ngā whānau Te Wano hoki anō.
Ko ngā iwi[takatā | takatā pūtake]
Ko te tino iwi o tēnei marae ko Ngāti Tūwharetoa. He kaha tonu ngā herenga ki a Ngāti Kahungunu, ki te iwi o Nanny Maraea. He pānga o te nuinga o ngā tāngata ki ēnei iwi e rua. Mō te taha ki a Ngāti Tūwharetoa, ko Ngāti Manunui te hapū, ko Pungapunga te awa. I raro iho nei te pepehā o Ngāti Tūwharetoa:
- Ko Tongariro te maunga
- Ko Taupō-nui-a-Tia te moana
- Ko Tūwharetoa te iwi
- Ko Te Heuheu te tangata.
He marae mokemoke[takatā | takatā pūtake]
He āhua mokemoke tō tēnei marae, e kinokino haere ana ngā whare. Ruarua noa iho ngā uri kei te toe. Ko te nuinga e noho ana ki wāhi kē. Koia rā he ruarua ngā kaimahi, ngā kaiāwhina; he uaua rawa te kohi moni hei whakapai i ngā whare o te marae. Engari, ko te whakaaro, he tokomaha rawa ngā uri, engari, kua marara ki ngā hau e whā, kei Aotearoa ētahi, kei Ahitereiria ētahi. Koia rā kua waiho mā te mōrehu e mahi ngā mahi o te marae.
He mihi[takatā | takatā pūtake]
E mihi atu ki ngā mea e kaha tonu te mahi whakahaere, mahi whakapai i tēnei marae. E mihi ki ngā kaumātua tūpuna i whakatū ai tēnei marae, ki a Nehuora rāua ko Te Wakatahurangi Te Warahi. E mihi ana ki ngā uri, ki a Douglas rāua ko Kahui Wallace, ki a Kevin rāua ko Milly Te Wano. Ki te kore he tāngata e kaha ana ki te tautoko i ā rātou mahi, he tītaha kē te tū o tēnei pā.
Hoto ki waho[takatā | takatā pūtake]
Tohutoro[takatā | takatā pūtake]
J.Te H Grace, 1959. Tuwharetoa, Te Whanga-nui-a-Tara.