Haina

He tuhinga tēnei mō te Tūwehe-ā-Iwi o Haina. Tirohia te tuhinga 'Taiwana' mō te Tūwehe o Haina.

中华人民共和国
Tūwehe-ā-Iwi o Haina

(Pīwari o Haina) (Tohu o Haina)
Reo a te motu	Reo Hainamana
Tāone matua	Peihinga
Perehitini	Xi Jinping
Pirimia	Li Keqiang
Rahi	377,8 9,640,821 35 km²
Taupori	1,339,724,852
Moni	Yuán (¥)
Ngaringari a te motu	义勇军进行曲 (Yìyǒngjūn Jìnxíngqǔ, March of the Volunteers)

Ko Haina, arā te Tūwehe-ā-Iwi o Haina (reo Hainamana: 中华人民共和国; pinyin: Zhōnghuá Rénmín Gònghéguó; reo Pākehā: People's Republic of China), tētahi whenua ki Āhia-ki-te-Rāwhiti.  Koia te whenua tino taupori o te ao me ōna kiri rarau 1.35 piriona.  He wehenga pāti-kotahi te tūwehe-ā-iwi nei e whakahaerea ana e te Pāti Tōpū o Haina mai te ūpokonga o Peihinga.  He mana whakahaere tōna ki ngā kāwanatanga 22, ngā rohe ture-whaiaro e rima, ngā manatāone hautū-tauaro e whā (Peihinga, Tianjin, Shanghai, Chongqing), me ngā rohe whakahaere motuhake nuinga kāwana-whaiaro e rua a Hongipua me Makao.  Ka kokoraho hoki te Tūwehe-a-Iwi i ngā takiwā e whakahaerea ana e te Tūwehe o Haina (tētahi hinonga tōrangapū motuhake e tapaina auautia ko Taiwana), arā ko ngā moutere o Taiwana, Jinmen, Mazu, me ētahi atu ki te Moana Haina-ki-te-Tonga.  He mea tautohetohe ēnei kokoraho nā te āhua manganga o te tūnga tōrangapū o Taiwana.

He whenua rahinga whakahara tō Haina:  9.6 miriona km², arā, te rahinga whenui tuarua o te ao, rahinga tapeke tuatoru, tuawhā rānei e ai ki ngā tukanga ine rerekē.  He mea whakahara, kanorau hoki tō Haina matawhenua, mai ngā pākihi ngahere me ngā koraha o Gobi me Taklamakan i tōna raki maroke ki ngā ngahere āhuapārū ki tōna tonga mākū.  Mā ngā pae maunga a Himaraia, Karakoram, Pamir me Tian Shan ka weheruatia a Haina i te tonga o Āhia Waengapū.  Ka rere ngā awa e rua a Awawhāroa me te Awa Pīngao -ngā awa roanga tuatoru me tuaono o te ao- mai te Mānia Tipeta ki te tapātai rāwhiti apiapi.  14,500 km te roanga o tō Haina takutai i te Moananui-a-Kiwa, ā, ka tāparepare i te Moana Bohai, te Moana Pīngao, te Moana Haina-ki-te-Rāwhiti, me te Moana Haina-ki-te-Tonga.

Ko te pokapū o Haina tētahi o ngā tūrangawaewae tūpori, reira tētahi o ngā tūpori tuatahi o te ao i pūāwai i tō te Awa Pīngao riu haumako.  Mō ētahi mano tau, he punaha tōrangapū manaariki whakaheke tō Haina, i timata ki te Kīngitanga o Xia (he mea āhua-pakiwaitara) i te tau 2,800 mua.  I te tau 221 mua i whakakotahitia tuatahitia ētahi wehenga maha kia tū tuatahi ai te Emepaia o Haina, ā, mai rā anō ka tīwhera, ka piere, ka whakakotahi anō.

Nā te Tūwehe o Haina te kīngitanga whakamutunga i turaki i te tau 1911, ā ka whakahaere i te tuawhenua tae atu ki te tau 1949.  Nō muri i te haurarotanga o te Emepaia Nipono i te mutunga o te Pakanga Aorere II, ka taieritia te Pāti Guomindang i te tuawhenua e te Pāti Tōpū, ā, ka whakaūria te Tūwehe-a-iwi o Haina i te 1 Whiringa-a-nuku 1949.  Ka heke te Guomindang ki te moutere o Taiwana, tū ai tōna kāwanatanga ki tōna ūpokonga ōnāianei, arā te tāone o Taipei.

Mō te nuinga o ngā tau e rua mano o mua, nō Haina te ōhanga tino nui, tino matatini o te ao, ahakoa āna piki me āna heke.  Mai te timatanga o ngā whakatikatikatanga ōhanga i te tau 1978 ka puta mai a Haina hei tētahi o ngā ōhanga kaitā whanake hohoro o te ao.  I te tau 2014 i puta mai a Haina hei ōhanga tuarua o te ao ā-GPD tūingoa, te ōhanga tuatahi rānei ā-GDP āheinga hoko ōrite.  Ko Haina te kaikaweatu rawa tuatahi me te kaikawemai rawa tuarua o te ao.  He mana karihi whakamōhiotia, ā, nōna te taua pūmau nui rawa, me te tahua waonga tuarua o te ao.  He peke Kotahitanga Aorere (KoAo) te Tūwehe-a-Iwi o Haina mai te tau 1971, nō tēnā tau ka whakakapi ia i te Tūwehe o Haina hei peke toitū o tō te KoAo Rūnanga Haumaru.  He peke a Haina o ētahi whakahaere tāhapatini maha ōkawa, ōpaki hoki, pērā i te Whakahaere Tauhokohoko Aorere, te Ruruku Ōhanga Kiwa-Āhia (APEC), BRICS, te Whakahaere Ruruku Rungamoana, te BCIM me te G20.  He mana hira a Haina, he mana rohe kaitā hoki ki Āhia, ā, e ai kī ētahi kaitātari he tuamana torohū.  

Tāone nui

Nā ō rātou taupori i 2010.

• Shanghai - te tāone nui
• Peihinga - te tāone matua
• Guangzhou
• Shenzhen
• Tianjin
• Chengdu
• Wuhan
• Dongguan
• Foshan
• Chongqing
• Hangzhou
• Nanjing
• Shenyang
• Xi'an
• Harbin
• Qingdao
• Dalian

• Haina - 中华人民共和国 - China
• 
  Peihinga
• 
  Maioro Nui Whakaharahara o Haina
• 
  Baodingshan i Dazu
• 
  Awa Li
• 
  Yangshuo
• 
  Ana Longmen i Luoyang
• 
  Taua Matapaia i Xi'an.
• 
  Shanghai

Hoto ki waho

• The Central People's Government of People's Republic of China (reo Pākehā)
• China at a Glance (reo Pākehā)