Mickey Mouse

Nō Wikipedia Māori
Jump to navigation Jump to search

He kararehe pakiwaituhi hātakēhi a Miki Kiore, he taonga waimarie hoki nā The Walt Disney Company. He mea hanga ia nā Walt Disney rāua ko Ub Iwerks i te tau 1928. He kiore whakatangata mau tarau poto whero, hū kōwhai nui, karapu mā, ko Miki tētahi o ngā kaiāhua pakiwaituhi tino rongonui, e mōhiotia whānuitia ana huri noa i te ao.

He whakakapinga i hangaia ai mō tētahi kaiāhua pakiwaituhi Disney o mua, mō Oswald the Lucky Rabbit, i kitea tuatahitia a Miki i te pikitia poto e kīia nei ko Plane Crazy, ā, i whakaputaina tuatahitia a ia i te pikitia poto e kīia nei ko Steamboat Willie (1928), ko tētahi o ngā pakiwaituhi whai oro tuatahi. I muri atu i tērā, i whakaaturia ai ia i te neke atu i te 130 ngā pikitia, pērā i The Band Concert (1935), Brave Little Tailor (1938), Fantasia (1940) anō hoki. I whakaaturia nuitia a Miki i ngā pikitia poto, i roto anō hoki i ngā pikitia roa i ētahi wā. Tekau ngā whakaaturanga pakiwaituhi a Miki i whakaingoatia mō te Academy Award for Best Animated Short Film, ko tētahi o ērā ko Lend a Paw, i whakawhiwhia ai ki te tohu nei i te tau 1942. I te tau 1978, i meinga ai a Miki ko te kaiāhua pakiwaituhi tuatahi kia whakawhiwhia ki tētahi whetū i runga i The Hollywood Walk of Fame.

Mai i te tau 1930, kua whakaaturia whānuitia hoki a Miki hei kaiāhua waituhi whakakata. Ko tāna waituhi whakakata i roto i te niupepa (i tapaina ai ko tōna ake ingoa), i tuhituhia nei e te kaiwaituhi matua e Floyd Gottfredson, i tāia mō te 45 tau te roa. I whakaputaina hoki a Miki i ngā kōmeke, pērā i a Topolino nā Disney o Itaria, MM - Mickey Mouse, Mystery Magazine, me te Wizards of Mickey, me ētahi hōtaka pouaka whakaata, pērā i The Mickey Mouse Club (1955-1996) me ētahi atu. E kitea ana hoki a ia i roto i ētahi atu āhuatanga o te ao pāpāho, pērā i ngā tākaro ataata, me ngā taonga hokohoko, ā he kaiāhua hoki a ia e taea ana te tūtakitaki ki ngā pāka a Disney.