Whatumoana Paki

Ko Whatumoana Paki te hoa rangatira o Te Arikinui Te Atairangikaahu. Ko ia hoki te matua o te Kīngi Māori o te wā, ko Kīngi Tuheitia tērā.

Herenga whakapapa

Ko te matua tāne o Whatumoana ko Wetere Paki, nō Waikato anō; ko tana whaea ko Paranihi, nō Te Aupōuri, Te Kao, Te Tai-tokerau. Hei mokopuna a Paranihi ki a Parāone Ngāruhe, nāna i haina Te Tiriti o Waitangi mō te taha ki a Te Aupōuri. He rangatira ingoa nui a Parāone Ngāruhe i ngā tau nō muri mai o te taenga mai o te Pākehā ki Te Tai-tokerau. Nā Parāone Ngāruhe ko Ngāwaka; kei Matarau, te urupā o Ngāi Takoto, te moenga whakamutunga a Ngāwaka. Kei Awanui taua urupā. Nō Ngāi Takoto tana whaea, a Maatahinerangi Awarau. Ka moe a Ngāwaka i a Meri Mete, nō Tangoake, Pārengarenga. Ko tā rāua tamāhine, a Kiritokia, te whaea o Paranihi, te tupuna wahine o te Kīngi Māori hou.

Tohutoro

• The Northland Age, 'A new Maori monarch with Te Aupouri links', 24 Heri-turi-kōkā 2006